Getxo Kirolakek Fadurako parkearen paisaia-eraldaketa bultzatu du

Marta Gonzalez eta Amaia Zabala, G&C Arquitectura Urbanismo y Paisaje estudioko arkitektoak, Getxo Kirolakekin batera lanean aritu dira parkeko egungo eta etorkizuneko proiektuak bideratzen dituen urbanizazio-gida sortzeko. Eskerrak eman nahi dizkiegu ekarpen garrantzitsu hori egiteagatik eta bidali diguten artikulu honengatik, hirigintza-ikuspegi honi buruzko ikuspegia partekatzen baitute bertan.

“Aisia, kirola eta naturaz gozatzea funtsezko elementuak dira pertsonen bizitzan. Hori dela-eta, Fadurako kirol-parkea oso garrantzitsua da Getxorentzat, eta zaindu, berritu eta premia berrietara egokitu behar da. Esperientzia baliotsuak izan eta Getxoko biztanleen imajinario kolektiboaren parte izan nahi duen lekua da. Beraz, paisaiaren pertzepzioak garrantzi berezia hartzen du espazio honetan.

Parkea hiri-ehunean eta Gobela ibaiaren ondoan aurkitzen da, eta horrek ingurunea eraldatzeko ahalmena ematen dio. Testuinguru horretan, G&C taldearentzat pribilegio bat izan da paisaia hobetzeko prozesu honetan laguntzea, eta funtsezko alderdi batzuk partekatzen ditugu.

Getxo Kirolakeko taldearekin lankidetzan hastean, lehenik eta behin Thinking Faduraren esparruan parte hartzeko egindako prozesua ezagutu eta “geureganatu” genuen. Guretzat, Fadurako parkearen “ametsak” ulertzea funtsezkoa zen.

Gainera, parkearen egungo egoera paisaiaren ikuspegitik aztertu genuen, balio edo potentzial handieneko alderdiak, elementuak eta espazioak ez ezik, multzoaren pertzepzioan kaltea dakartenak ere identifikatuz. Lehen fase horretan, eraldatzeko eta hobetzeko ideia nagusiak definitu ziren:

• Bir-naturalizatzea, batez ere errekaren ertzetan, naturan oinarritutako irtenbideen bidez eta ingurunearekin bat datozen materialak erabilita.
• Ikuspegi bateratua sortzea, nortasun propioarekin, seinaleak, altzariak eta argiztapena homogeneizatuz, parkeak orain arte izandako berezko bilakaera gaindituz.
• Inpaktu eta potentzial handieneko espazioak eraldatzea; hala nola, sarrerako eremuak eta erabilera berrietarako aukera ematen duten guneak.
• Mugikortasun iraunkorra sustatzea, bizikletentzako konexioekin, bizikletentzako aparkalekuekin eta parkearen barruko ibilbide espezifikoekin.
• Iraunkortasuna indartzea, drainatze iraunkorra, energia-eraginkortasuna eta material birziklagarriak eta balio-bizitza luzekoak erabilita.
• Parkearen pertzepzioa hobetzea ingurunetik, Bolueko hezegunearekiko irekiera, iragazkortasuna eta lotura erraztuz.

Ikuspegi orokor hori osatzeko, Fadurako parkerako urbanizazio-gida bat egin da, egungo eta etorkizuneko esku-hartzeei nortasun komuna emateko balio duena, eta hori gauzatzeko proiektu-plan bat aurreikusi da. Azken finean, bizitzeko ingurune gisa duen izaera indartu eta areagotu nahi da, nortasun propio eta guzti eta paisaia naturalarekin bat eginez”.