Carlos Giménez Madrilgo Unibertsitate Autonomoko Antropologiako katedraduna eta DEMOSPAZ Institutuko zuzendaria da.
“Asko poztu naiz #ThinkingFadura ekimena ezagutzearekin, lehenik eta behin, Getxo asko maite baitut, udalerriko Integrazio, Bizikidetza eta Garapen Sozialeko lehen Planean parte hartu nuenetik, eta, bigarren, ekimena oso interesgarria baita kultur arteko ikuspegia aplikatzeko kirol-zentro publiko batean, aisiarako lekuan.
Aspaldidanik uste osoa dut kultur arteko ikuspegia hiru printzipio handiren konbinaketa arduratsuan eta etikoan oinarritzen dela: berdintasuna, dibertsitatea eta elkarreragite positiboa. Beraz, printzipio horiek Fadura espaziora aplika ditzagun.
Hasteko, pertsona, kultura eta talde guztien erabateko berdintasuna; halaber, aukera-berdintasuna espazioa ongi aprobetxatu ahal izateko. Berdintasunaren ikuspegiari erreparatuta, ezinezkoa da bakoitza espazio jakinaren zati batean egotea, ezinezkoa da segregazioa, diskriminazioa eta tratu desberdina edonori, edozein talde etnikori, erlijiosori, e.a. #ThinkingFadurak asko du berdintasunetik.
Bigarren printzipioa dibertsitatearekiko errespetua da. Ez da soilik baterako existentziaren errespetu pasiboa, bizikidetzako errespetu aktiboa eta beste pertsonekiko interesa baizik. Ildo horretan, garrantzitsua da Fadura gorputzak, aurpegiak, musika eta hango kirol-motak ospatzeko gunea izatea. Gainera, dibertsitate hori aprobetxatu behar da denen arteko proiekturako, eta horrek hirugarren alderdira garamatza; hau da, elkarreragite positiboa.
Hirugarren printzipio honek, elkarreragite positiboak, ekarpen espezifikoa egin dezake kulturartekotasunetik Fadura parkearen etorkizuneko proiekturako, kontuan hartuta leku hori izango dela bakoitzak nahi duena egiteaz gain, harremanetarako, elkarrizketarako, elkar ezagutzeko edo elkarrekin ikasteko lekua, denen ondasun bat, ondasun publikoa dela azpimarratuta.
Pozgarria da Getxoko bizilagun guztiak ez ezik, kanpoko pertsonak eta bisitariak ere harro egoteko aukera izatea kirola praktikatzeko, bizikidetzarako, kohesiorako eta inklusiorako leku bat izatearekin.
Zorionak eta jarraitu aurrera ekimenarekin!”.