Bizikletak eta patineteak aparkatzeko sistema berria iritsi da Fadurara

thinking Fadura partaidetza-prozesuan egiaztatu ahal izan dugunez, Fadurako erabiltzaileek bizikletak eta patineteak aparkatzeko sistema segurua, praktikoa eta espazioetan, pertsonengan eta ingurumenean eragina izango duena izateko eskaera egin dute.

Horrenbestez, Getxo Kirola-kek hainbat ekintza jarri ditu abian Fadurako erabiltzaileei mugikortasun seguru eta jasangarria erraztuko dien bizikletak eta patineteak aparkatzeko balizko sistema baten behar zehatzak detektatzeko.

Beharrak entzuteko ekintzen artean, datu-bilketa bat egin zen formulario digital baten bidez, informazioa Getxo Kirolak-eko langileekin kontrastatu zen eta lan-saio bat egin zen gaian adituak diren Getxoko pertsonekin. Ekintza horien ondorioz, Fadurako kirol-parkean bizikletak eta patineteak aparkatzeko irtenbide eraginkorrak eskaintzerakoan kontuan hartu beharreko zenbait baldintza definitu dira.

Oro har, bi aparkaleku mota zehaztu dira:

1. Aparkaleku banatuak eta irekiak. Bizikletak eta patineteak kanpoko lekuetan ainguratzeko beharrezkoak diren elementuen multzoa da, sarbide-kontrolik gabe. Herritarren entzuketak eta Getxo Kirolak-eko langileekiko kontrasteak lagundu dute konponbide mota hori jar dezaketen 12 kokaleku detektatzen.
2. Aparkaleku zentralizatuak eta itxiak. Bizikletak gordetzeko bereziki prestatutako guneak dira. Ainguratze-soluzio zentralizatu eta itxi horretarako sarbideak sarbide-kontrol bat izango luke, Getxo Kirolak-eko abonu-txartelaren bidez.

Proiektu pilotuarekin hasiko gara

Bizikletetarako eta patineteetarako aparkalekuen hedapenean lehen urratsa eman den arren, horrelako konponbideak aurrerago garatuko dira, Getxo Kirolak Fadurako kirol-parkearen kanpoko eremuen hirigintza-antolamenduari ekiten dionean. Alde horretatik, kontuan hartu behar da aparkalekuak jendea ibiltzen den lekuetan edo kirol-jarduera egiten den lekutik gertu egon behar direla, eta bideozaintza-sistema iraunkorra izan behar dutela.

Orain, proiektu pilotu batez hasiko gara, aparkaleku-proposamen berria eta horren eraginkortasuna testatzeko, sistema segurua, praktikoa eta garraiobide jasangarri eta osasungarri hori erabiltzen duten pertsonen beharretara egokitua izan dadin. Ildo horretan, eta prozesu honetan parte hartu duten adituen jarraibideei erreparatuz, aparkalekuek “U” alderantzikatuaren formako ainguraketa-elementu bat dute, eta 2 bizikleta kateatzeko aukera ematen dute, alde bakoitzeko bat, koadroaren hiru puntu desberdinetan.

Patineteetarako aparkalekuei dagokienez, ainguratze-elementu bat aukeratu da, patineteak Fadurako instalazioen barruan dagoen egitura batean giltzapetu ahal izateko.

Azkenik, eta prozesuan parte hartu zuten adituek iradoki zuten bezala, proba pilotuan honako informazio hau duen panel bat jartzea ere kontuan hartzen da: bizikletak behar bezala gidatzeko argibideak eta bizikletetarako bide-segurtasunari buruzko oinarrizko argibideak.

Hurrengo urratsak

Fadurako eraikin nagusiaren sarreran bizikletak aparkatzeko sistema pilotua instalatu ondoren, bai eta eraikin bereko patineteetarako aparkalekuak ere, Getxo Kirolak-ek horien erabilera behatzeko prozesu bat hasiko du, eta proben banku gisa balioko du, parke osoan gainerakoen hedapenean egon daitezkeen hobekuntzak antzemateko.

Sistema berri hau erabiltzera eta erabiltzaile gisa izandako esperientzia kontatzera animatzen zaitugu.